CJ NEWS

"JOSE AVELINO: AN OBRERO SA SENADO," Siday Writing/performance competition, iginlansad; mga ESTEHANON, gin-awhag pumartisipar


By: Penelope Añosa Bulan Pomida
JOSE AVELINO: AN OBRERO SA SENADO, Siday Writing/performance competition, iginlansad; mga ESTEHANON, gin-awhag pumartisipar
Borongan City, Oct. 6, 2022 (DYES/RP)--IGINLANSAD an "JOSE AVELINO: AN OBRERO SA SENADO," Siday Writing/performance competiton han Calbayog Journal ha pakigsumpayan hiton LGU- Calbayog pinaagi hit City Arts and Culture Office (CACO).

Ini an nabaruan han RP-Borongan ha pakighimangraw kan Ms. Josephine M. Mendoza, Managing Editor, Calbayog Journal ngan SIDAY Competition Secretariat Head.
Sumala kan Mendoza, an kompetisyon nga may titulo: "JOSE AVELINO: AN OBRERO SA SENADO" in usa nga proyekto hit Calbayog Journal.

Sakòp hini an bug-os nga Isla han Samar diin an mga SAMARNON an kwalipikado nga mga participants, na-edad 15 anyos pa-igbaw.

Pinaagi han nasabi nga titulo han SIDAY, ginlalauman nga mahinunumduman hit mga SAMARNON an kinabuhi ngan an legasiya ni JOSE DIRA AVELINO-- an iya simple nga gintikangan, mga adbokasiya, an kahimtang han iya pamilya, an pagsagka ngadto ha senado ngan an iya pagin Senate President.

Kasumpay hini, gin-awhag ni Mendoza an mga Estehanon nga bumulig hini nga SIDAY CONTEST.

DUHA an pamaagi han kompetisyon, kon diin an SIDAY WRITING an MAJOR CONTEST samtang an PERFORMANCE SHOWDOWN an supplemental Contest.
An mapartisipar nga magsusurat hin SIDAY in nakatalaan makadaùg hin P50K komo grand prize ngan mayda consolation prize P5K ha mga finalists nga hibubulig ha TOP 3.

An deadline han pagsubmiter han entries hit Nov. 15, 2022, ngan igpadara ini via email ha jdavelino.sidaywritingcontest@gmail.com.

Sumala pa kan Mendoza iton SHOWDOWN hiton performances han 6 nga best entries kada kategorya in pagbubuhaton hit Jan. 10, 2022 ha Calbayog City kon mahiproklamar, mahi-anunsyo na na an mga winners han writing competition.

Ighahatag an cash prizes ha top 3 best performers han 2 nga kategorya durante hiton showdown.

Ginhayag pa ni Mendoza nga ha Borongan City naka-post nga 2 ka set hin information sheet (naka-print ha tarpaulins) makikita ha PROVINCIAL CAPITOL GROUNDS ngan ha ESSU -Borongan main campus, para hin kadugangan nga detalye, sugad han guidelines/mechanics han nasabi nga competition.

Puede liwat bisitahon an CALBAYOG JOURNAL WEBSITE para han downloadable copies han guidelines ug an OFFICIAL ENTRY FORM.

Panuyo hini nga paisan-isan nga ma-preserbar ngan mahi-undong an "art' hit SIDAY WRITING ngan ma-aghat an mayda mga talento nga padayon magsurat, magkomposo hin mga siday.

An mga 'winning entries' ngan pilì nga mga non-winning entries in ig-bubutang ha libro, dugang nga pahayag ni Mendoza.#
(pbpomida/dyes-RP)


-, October 8, 2022


Grab A Copy Now!


The Calbayog Journal (also known as CJ)
is an on-line news service covering Eastern Visayas area.
CJ aims to offer unbiased coverage of the people and events in Eastern Visayas.



(c) 2015 - 2019